My taal, jou taal, daai ander taal

In my lewe het ek nou al in ‘n paar plekke gewerk, maar nog nooit was taal so ‘n issue soos waar ek tans is nie.  Ok, miskien is issue die verkeerde woord, maar as jy ‘n paar mense bymekaar gooi, en hulle almal laat Engels praat, terwyl dit nie een van hulle se huistaal is nie, kan jy ‘n babelse verwarring te wagte wees.  Of net ‘n lekker lag.

Nou die tale wat ons mense praat is Afrikaans, Xhosa en Sjona.  Almal baie verskillend, wat ook maak dat selfs die Engels wat ons almal probeer praat in dialek verskil.

My eerste kennismaking met hierdie vreemde taal, was toe my kollega my vra of ek weet waar bu-thê-zig is.  Ek was bietjie verward, want ek ken nogals die kaap, maar selfs hierdie plek was vir my vreemd, en ek het reggesit met google om hom te help.  En toe begin hy spel… B O T H A S I G.

‘n Rukkie terug kom ons sekretaresse na my toe, nadat sy gaan kos koop het in Bellville CBD.  Ek kan sien sy is ietwat ongemaklik.  Aangesien ek Afrikaans is, en sy vermoed die woord wat sy gehoor het is Afrikaans, kom vra sy toe vir my wat beteken “jas”.  Nadat ek vir haar verduidelik het dat dit ‘n “coat” is, was die verwarring op haar gesig baie groot.  Blykbaar maak dit nou vir haar nog minder sin.  Sy het glo twee bergies hoor stry, en toe skree die vrou vir die man “ma djy is djags man!”  Nou hoe sou jy daai verduidelik het sonder om te lag!

Ek het self al ‘n bloutjie of drie geloop met my vinnig Engels praat, veral op die foon.  So het ons byvoorbeeld ‘n donateur wat vas glo my naam is Ietsadel.  Want toe hy my op die foon vra “who’s speaking now”, toe antwoord ek “it’s Adele”, dalk bietjie vinnig.

Vanmiddag met ete is ek weereens herinner aan hoe verskillend ons tale is, en het toe besluit dit kan nie ongeskryf gaan nie.  Ons ontvangsdame, wat se sitplek in die middel van ons kantoor is, het nie vandag ingekom nie.  Nou jy moet verstaan, dit is ‘n klein plekkie waar ek werk, jy weet gewoonlik wie wanneer toilet toe gaan of koffie maak, so klein is dit.  Twee van my kollegas het begin om hulle middagetes saam met my te kom eet in my kantoor (die raadsaal).  So sit en lees ons koerant, en bespreek sommer goed wat ons mag raaklees.  Ek draai ewe onskuldig na die een, en vra “where is Nyami today?”, met die bedoeling dat sy dalk weet hoekom Nyami nie ingekom het nie, of daar dalk siekte is, of sy haar kind moes versorg, of so iets.  Die antwoord gooi my eers, en laat my toe lag.  “I don’t know, I don’t think she is here”.  Wel, is jy seker? Moet ons dalk onder die lessenaar gaan kyk?

Dit is sulke dinge wat mens bybly, lank na jy by ‘n werk weg is.  Ek eis egter om te dink wat sal gebeur as ons nog ‘n taal by die mix ingooi…

Nog ‘n 7de Laan terugblik

Ek het onlangs gewonder wie in daai eerste episode van 7de laan gespeel het.

Mens word so oorlaai met alles wat op tv aangaan, dat jy vinnig vergeet wat ‘n jaar terug gebeur het.  Name soos Petra en Simphiwe, Tamara en Mari-Alet raak vergete as hulle vir ‘n tyd lank verdwyn uit ‘n sepie.

Ek het egter op twee baie interessante artikels afgekom, beide uit die Beeld koerant in 2000, toe 7de Laan begin het, en ‘n skrale 6 maande uitmekaar geskryf.  Laat mens wonder…

7de Laan’ ‘n bontspul en bra voorspelbaar – 7 Apr 2000

7de Laan SABC2, Dinsdae en Woensdae om 18:30

Die eerste episode van ‘n nuwe reeks behoort soveel impak te hê dat ‘n mens nie kan wag vir die volgende aflewering nie. 7de Laan, SABC2 se nuwe Afrikaanse sepie wat vandeesweek begin het, het on gelukkig nie met die nodige oemf afgeskop nie. Kontinu¨teitsaankondiger Chante Hinds het vooraf gesê dit is SABC2 se eerste sepie. Het hulle gerieflikheidshalwe vergeet van Glaskaseel, wat destyds ‘n mislukking was? Die nuwe 7de Laan spog met ‘n sterk rolverdeling Anna-Mart van der Merwe, Gys de Villiers, Wilna Snyman, Pierre van Pletzen, Dawid Minnaar, Annalise Weiland en Chris van Niekerk sowel as ‘n hele paar belowende nuwelinge kan onder andere daarin gesien word maar die dialoog is soms yl en die storielyn baie voorspelbaar. Snyman vertolk die rol van die matriarg Madel Terreblanché, wat die hef in die hand het en alles en almal om haar regeer. Sy is glad nie in haar noppies oor die verlowing van haar seun Jan-Hendrik (Waldemar Schultz) aan die argitek Petra (Yvonne van den Bergh) nie. Dit is ‘n ou, geykte resep onthou nog die sepie Falcon Crest? Dit is dalk onregverdig om 7de Laan met die gevestigde treffersepie Egoli te vergelyk, maar aangesien die nuwe reeks in die tydgleuf net ná Egoli uitgesaai word, kan ‘n mens byna nie anders nie as om die twee teen mekaar op te weeg. Die stelinkleding (die meeste mure is grys!) sowel as die kleredrag van die karakters van 7de Laan steek sleg af teen dié van Egoli. Só ‘n bontspul het jy lank laas bymekaar gesien in die eerste episode het Vinette Ebrahim (Charmaine van die koffiekroeg) ‘n bont bloes gedra, terwyl Van Niekerk (Francois) en Van Pletzen (Oubaas van Zyl) geruite hemde en Weiland (die ontvangsdame Hilda) ‘n bont onderbaadjie (met ‘n verspotte serpie) gedra het. Die bont uitrustings streel nie die oog nie en slaag ook nie op die skerm nie. Van den Bergh (Petra) het boonop in die oggend ‘n blink halsnoer gedra en jy wil kort-kort haar hare uit haar oë vee. Die musiek is soms, soos toe Sandra Stutterheim (Heléne Lombard) haar opwagting as die nuwe koper van die boetiek gemaak het, te dramaties en oordrewe. Om nie te praat nie van al daardie agtergrondgeluide (sirenes en motoralarms) in bykans elke toneel wat jou daaraan moet herinner dat die storie in ‘n stad afspeel. Egoli het baie hoë standaarde vir sepies in Suid-Afrika gestel nie net wat sterk storielyne, stelinkleding, kostuums en dialoog betref nie, maar ook goeie vertolkings. Hoewel sommige van die jong akteurs (soos Nina Swart in die rol van Wilmien) imponeer met hul spel, oortuig ander nuwelinge soos Van den Bergh in die rol van Petra nog nie. ‘n Mens moet 7de Laan seker ‘n regverdige kans gee, maar of die sterk rolverdeling die sepie gaan red, sal net die tyd leer.

7de Laan klink glase – 20 Oct 2000

Waldemar Schultz (Jan-Hendrik Terblanche) en Yvonne van den Bergh (Petra Malherbe) raak binnekort verloof in 7de Laan.

Daar is vandeesweek dubbeld feesgevier op die stel van SABC2 se Afrikaanse sepie 7de Laan. Tydens ‘n onthaal is bekend gemaak dat ‘n tweede kontrak vir die vervaardiging van nog 156 episodes van die reeks onlangs met die SABC gesluit is. 7de Laan word tans twee maal per week uitgesaai, op Dinsdae en Woensdae om 18:30. As gevolg van die gewildheid van dié sepie sal dit vanaf 1 April 2001 drie of vier maal per week uitgesaai word. Nóg ‘n verskoning vir ‘n makietie is die trouklokkies wat binnekort vir twee van die karakters in die reeks lui. In die episode van 7de Laan wat op 1 November uitgesaai word, maak Jan-Hendrik Terreblanche (Waldemar Schultz) en Petra Malherbe (Yvonne van den Bergh) hul trouplanne bekend aan vriende en familie tydens ‘n spoggerige verlowingspartytjie. Dié twee verliefdes se romanse was tot dusver nie net maneskyn en rose nie Jan-Hendrik se bemoeisieke ma, die formidabele Madel Terreblanche (Wilna Snyman) loop nie oor van blydskap oor haar seun se keuse van ‘n lewensmaat nie. Madel se oogappel, Tiaan (Francois Rautenbach), maak ook nie sake makliker vir sy broer nie met die manier waarop hy ogies maak vir Jan-Hendrik se toekomstige bruid. 7de Laan handel oor die wel en weë van ‘n groep mense wat in ‘n voorstad van Johannesburg woon. Die storielyn draai om twee groepe mense die Terreblanches, ‘n welgestelde familie wat gedomineer word deur die ambisieuse matriarg, Madel Terreblanche, en die inwoners van die woonstelle in dieselfde blok as die koffiekroeg, Oppiekoffie die gewilde bymekaarkomplek van omtrent almal in 7de Laan. Die rolverdeling van 7de Laan bestaan uit van Suid-Afrika se gewildste akteurs Anna-Mart van der Merwe, Wilna Snyman, Dawid Minnaar, Fezile Mpela en Annelisa Weiland, om maar net ‘n paar te noem. Daar is ook ‘n hele paar nuwe gesigte soos dié van Nina Swart en Ingrid Paulus, wat alreeds diep in kykers se harte gekruip het. 7de Laan is SABC2 se eerste sepie en word geskryf deur Danie Odendaal. 7de Laan blyk baie gewilde gesinsvermaak te wees nie net vir Afrikaanse mense nie. Onlangse navorsing het getoon dat die reeks ook baie gewild is onder Engelstalige kykers en Sotho-sprekers.

Gaan jy omval as ek jou stamp?

Oor die afgelope Desember vakansie, sien ek vir die eerste keer iemand met hierdie nuwe Power Balance armbandjies.

Vir vrede en welstand sal ek liefs nie name noem nie, maar die dingetjie fasineer my, en ek vra ‘n demonstrasie.

Nou blykbaar, om nou te verstaan wat hierdie dingetjie kan doen, moet jy op jou een been staan, met die ander been soos ‘n koeksister rondom die ander ene gevleg, en dan jou arms sprei, en dan moet iemand jou nou probeer omstamp.  Sonder die armbandjie, val jy soos ‘n Jenga speletjie.  Met die tweede probeerslag moet jy die armbandjie aansit, en dan is die val meer onwaarskynlik.

Baie oulik?  Nou beantwoord dan vir my hierdie vraag.  Buiten vir akrobate en gimnaste, watter regdenkende mens doen hierdie “oefening” elke dag?  Is dit normaal?  Is dit hoe alle mense staan?  En as volwassenes, hoe gereeld probeer ons ander mense omstamp?

Nou groot was my innerlike pret toe daar ‘n berig verskyn waar die geloofwaardigheid van hierdie bandjies heeltemal verpletter word.

http://www.health24.com/fitness/FitnessDoc_articles/16-4596,60576.asp

Placebo?

Wel, ek probeer om nie te lag as ek iemand sien met ‘n bandjie nie.  Dit laat my egter besef hoe maklik dit is om mense te mislei.  Maar ek sal vir niemand sê om die bandjie af te haal nie.  As ‘n bandjie al is wat nodig is om jou brein so te manipuleer dat jy nie meer karsiek raak nie, en perfekte houe in golf slaan, en bo-op ‘n fiets kan bly… wie is ek om te kla.

‘n Ram of ‘n Vis

So besluit “hulle” toe mos dat ek nie meer ‘n Aries is nie, maar eerder ‘n Pisces.  Volgens hierdie geweldig betroubare bronne, het die hele heelal een moewies skud gehad (het julle dit gevoel?) en dit het veroorsaak dat alles nou skeef getrek het.  Ja, selfs die sterrestelsel.

Hierdie (op)skudding het ‘n nuwe sterreteken, Ophiuchus laat verskyn, en al die ander lelik omgekrap.

Hy het hom netjies tussen Scorpio en Sagittarius gaan indruk, wat al die ander datums aanskuif, en ook maak dat  net ‘n week nou aan die arme Skerpioen afgestaan word.

(Blykbaar is hierdie nie so ‘n slegte idee nie.  Skerpioene is glo bombasties en sal bo-oor mense loop, hulle is jaloers en geheimsinning, kompulsief en obsessief.  Hoe minder van hulle, hoe beter)

Capricorn: January 20 to February 16

Aquarius: February 16 to March 11

Pisces: March 11 to April 18

Aries: April 18 to May 13

Taurus: May 13 to June 21

Gemini: June 21 to July 20

Cancer: July 20 to August 10

Leo: August 10 to September 16

Virgo: September 16 to October 30

Libra: October 30 to November 23

Scorpio: November 23 to 29

Ophiuchus: November 29 to December 17

Sagittarius: December 17 to January 20

Nou ek is gladnie een om elke oggend te gaan lees wat die dag vir my inhou nie, dit sal immers beteken dat ek meeste van die tyd net in die bed gaan bly.  Maar ek weet ek is ‘n Ram (Aries) en dit is basies al.  Met hierdie (op)skudding egter, het ek tog gewonder wat dit nou eintlik beteken om van ‘n Ram na ‘n Vis te verander.

Volgens die “sterre voorspel” mense (baie baie betroubaar) is ‘n Ram avontuurlustig en energiek, braaf, entoesiasties, selfversekerd en dinamies.  Ongelukkig ook ongeduldig en impulsief met ‘n vinnige humeur.  Die Vis is egter sensitief en saggeaard, met baie medelye en vriendelik.  Ook vaag en met geen eie wil nie.

As ek eerlik moet wees, is ek baie meer sensitief as selfversekerd, en baie meer saggeaard as braaf.  Ek is egter partykeer ongeduldig, en is entoesiasties oor baie goed!  Is ek dus ‘n Ram of is ek ‘n Vis?

My gevolgtrekking bly wat dit nog altyd was.  Elke mens is uniek, en waar ookal die son, die maan, die planete, jou pa en jou ouma was toe jy gebore was, maak nie saak nie.  Dit maak ook nie saak of die wind gewaai het, en daar ‘n oorlog was en of  jy onderstebo uitgekom het nie.  Niks gaan vir jou vertel wat more gaan gebeur nie, en dit is great!

Die grootste avontuur is dalk more, en jy wil nie in die bed bly en dit mis nie!

http://technolog.msnbc.msn.com/_news/2011/01/14/5841166-the-twitter-snowball-effect-the-zodiac-and-npr