Hie innie Bellville

Kyk, ek het nog nooit ‘n probleem gehad met waar ek bly nie.  Bellville (of bjelwil volgens die taxi drywers) is ‘n relatief netjiese stad, die buurt waar ek bly is stil, met massiewe bome en mooi huise.  Dis lekker sentraal geleë, jy kan binne 5 minute op die N1 of R300 wees, al die winkels wat jy nodig het is naby, en dit is nie ‘n toeriste bestemming nie, so die pryse is nog skaflik.  Overall ‘n heel lekker plek om te bly.

Tog is almal wat ek ken nie so trots om te sê hulle bly in Bellville (of waar ookal) nie.

So ken ek byvoorbeeld niemand wat in Parow bly nie.  Nou vir die wat nie weet nie, Parow is basies die stuk tussen Louis Leipoldt Hospitaal, die N1, en waar die bordjie sê “Welcome to Goodwood”.  Ja, dis ‘n groot area.  Maar wragtag NIEMAND bly daar nie!  De Tijger en Oostersee bars egter uit hulle nate!  Maar moet nie die fout maak om te dink dis Parow nie!  En as jy nou regtig nie kan wegkom met een van die twee nie, dan sit jy net “estate” agteraan die naam.  Maak dit stukke beter!

Ek ken ook niemand wat in Brackenfell bly nie.  Want daar is Protea -hoogte en -laagte en -vallei en –estate.  Maar dis gladnie deel van Brackenfell nie!  Selfde met Kraaifontein.  Blykbaar in die afgelope jaar of twee het al wat leef en beef in Kraaifontein getrek na hierdie wasigheid tussend Durbanville en Kraaifontein, genaamd Uitsig.

Ek wonder hoekom mense so skaam is om te sê waar hulle bly.  Gee ons regtig so baie om wat ander van ons dink, dat ons eerder langs ‘n steenkool fabriek in Uitsig sal bly voor ons in ‘n gemaklike huis in Brackenfell gaan woon?

Drop die image, en wees vir ‘n slag trots.  Op wie jy is, en waar jy bly…

 

4 Comments

Leave a Comment

Your email address will not be published.